الخميس، 22 مايو 2008

انا مكبوسه

ازيكم يا جماعه وحشتونى والله انا قلت اسيبنى من المذاكره ووجع القلب ده
واجى احكيلكم على كبستى اه والله انا انكبست
الموضوع من الاول انى هموت واشتغل وفى يوم من الايام واحده صاحبتى قالت لى انا جبتلك
شغلانه انما ايه روووووعه واللى كان نفسك فيها
انا طبعا طرت من الفرحه وكل اللى اعرفه واللى معرفوش قلت له انى هشتغل وللاسف نسيت
اذا بليتم فاستترو
المكان :عارفين اليوسي ماس اللى بيعلم الاطفال العبقريه
مش هوا ده ...حاجه شبهو اسمها عبقرينو
صحبتى قالت لى تعالى يوم الخميس الساعه2 قلت لها من 1 هكون عندك
والله كنت فرحانه اوى وقلت اخيرا هدرس للاطفال
بس انا بغبائي كنت فاكره ان اول مروح همضى العقد وهشتغل علطوووول
وجه يوم الخميس


دخلت وانا ايه منشكحه ووثقه من نفسي وفرحت اكثر واكثر لما لقيت المركز
على سنجه عشره قلت فى نفسى اكيد مظبطينو عشان انا جايه

لقيت خير اللهم اجعله خير بنتين غيرى متقدمين عشان يخدو مكانى
قلت حرام عليكم ده ظلم ظلم بس طبعا قلت فى سري
وخت فى جنابى وسكت
وقعدنا نتكلم شويه واكتشفت ان انا الوحيده اللى فى الكليه لسه
وكمااااااان هما خريجى تربيه طفوله وانا تجاره يعنى من الاخر مليش لزمه
قلت استهدى بالله يا روينا وامسكى نفسك واوعى تعيطى يمكن يكون لسه فى امل
وخليكى واثقه فى ربنا


وقعدت منشكحه
بس ملحقتش
لقيت بيدونى ورقه عرفت بعدين ان اسمهاcv


بس مكتوب حاجات غريبه اوى معرفتش اجاوب منها غير ثلاث اسئله اسمى وعنوانى وتليفونى
اه والله.منا لسه فى الكليه يعنى ولا ليا خبرات ولا كورسات ولا مهارات
المهم اول بنت دخلت وقعدت يجى ثلث ساعه
ومقلكوش بقا عليا كان قولونى مموتنى من الوجع
وجه عليا الدور
وانسو بقا كلامى عن الثقه بالنفس وكانت ركبى قاعده تخبط فى بعضها
لحد مجابت لى صداع من كتر التخبيط وضيفو عليهم القولون
يعنى من الاخر كنت عايزه دار مسنين
دخلت لقيت رجلين واحد المدير العام والتانى مدير برده
بس الحق يتقال كانو طيبين واطمنت خالص
اول سؤال اتسألتو انتى سايبه الورقه فاضيه ليه
انا: هو حضرتك متعرفش انى لسه فى الكليه
المدير: اه هو حضرتك اللى صحبتك قالت عليكى
انا:اى نعم
المدير:طيب خدتى قرصات قبل كده فى الكمبيوتر
انا:الصراحه لا
بس الحمد لله بعرف اقعد على النت والحمد لله عامله مدونه
وبعديها ندمت انى مقلتش انى عندى ايميل على الهوت ميل واميل على الياهو
وانى كمان بعرف ابحث فى الجوجل
يلا اهو الواحد مبيتعلمش ببلاش
المدير:ايه ده انتى عامله مدونه اوعى تكونى زى اسراء عبد الفتاح
وبتكتبى على سحلول(تصورو هو كمان عارف سحلول)
انا: لا لالا خالص انا اساسا مبعرفش اكتب يا سعادت الباشا
المدير:طيب ليكى خبره مع الاطفال
انا: الحمد لله انا معايا مجموعه زهرات فى النادى الصيفى بتاع نقابه الاطباء من ثلاث سنين
المدير: طيب لو طفل مكسوف هتعملى معاه ايه
انا : هقول له مالك هى القطه كلت لسانك
لو طفل طبيعى هيتكلم ويقول لا انا القطه مكلتش لسانى
اما لو الطفل تنح لى هقول له عارف لو متكلمتش هحطك فى قوضه الفيران
طبعا مقولتش للمدير على قوضه الفيران
المدير : هتخلصى امتحنات امتى؟
انا:يوم 16سته


مش عارفه كنت حاسه ان المدير كان على لسانه يقول لى طيب ايه اللى جابك
مفروض ان احنا هنستنى حضرتك عقبال متخلصى امتحانات
طيب جبتى ايه فى تقديرات السنين اللى فاتت
انا: الحمد لله مقبول ومره جبت فى ماده جيد
المدير :بدون تعليقققققققققققققققققققققققققققققققققققققققققققققققققققققققققققققققققققققققققققققققق

وروحت البيت وكنت طبعا عارفه الرد من قبل ما المدير يقول لى
والبركه فى البيه اخويا رفع فى معنوياتى
ولقيتو بيقول لى هما اللى خسرانين
قلت له الله يا خليك يا جابر بخطرى
قال لى ده ممكن يستغلو موهبك وتمسكى البوفيه
ولا لو طفل من الاطفال خد الكورس ومرضاش يدفع الفلوس
يقعدوه معاكى ساعه واحده وهيكون نسي كل الكلام اللى خده وكمان مش
هيكون فاكر حتى اسمه

بس انا لسه عندى امل وهقعد جنب التليفون جايز فى يوم من الايام يعرفو قيمتى ويتصلو
ولا ايه رايكم














هناك 82 تعليقًا:

khobayb يقول...

ههههههههههه

أضحك الله سنك ..

وأفادك بهذه التجربة ..

---

فعلا / محدش بيتعلم بدون مقابل ..

وقد يكون المقابل ضياع فرصة ربما تبدو هي الأفضل أو الأوحد ..

لكن تأكدي ان الخيرة فيما اختاره الله ..

وأن الله يقدر الخير دائما ..

وعسى أن تحبوا شيئا وهو شر لكم ، والله يعلم وأنتم لا تعلمون

ِِAdem El-Mahdy يقول...

ألسلام عليكم

لعلمك اختنا الكريمة انا برضه جالى شغلانة زى دى

و انا برضه طالب فى كلية هندسة يعنى مش تربية طفولة

بس الحمد لله

كان متقدم امتر من عشرين واحد و تربية طفولة و معاهم دبلومات

بس كان السى فى بتاعى قوى

و فى الاخر انا اللى رفضت الشغلانة

لانى بحب شغلى الا و هو البرمجة جداا

بصى يا سيدتى

لو عاوزه فعلا تخدى دورات فى الموضوع ده

ابداى فى دورات train of trainer

و ادى دورات للاطفال

يعنى مثلا
انا فى المسجد عندنا كنت اديت دورات للاشبال فى الابداع و مهارات الاتصال

بتدى سبورت جامد اوى

و ابدأى ابنى نفسك فى القراءة فى المجال ده


و انصح حضرتك بكتاب اسمه

كيف تصنع طفلا ممتعا
للاستاذ لامحمد عبد المعطى
هو طبعة دار التوزبع
و سعر الكتاب 10 جنيه

جزاكم الله يرا ووفقك لكل طاعة و تقوى

روينا يقول...

خبيب
جزاك الله كل خير
اه والله انا اتعلمت بمقابل ومش ببلاش
ده انا جالى هوسه كل ما التليفون يرن اقوم جررررى واقول هما
ربنا يستر عليا
والحمد لله انا عندى يقين ان ربنا هيعملى اللى فيه الخير

روينا يقول...

ِِAdem El-Mahdy
جزاك الله كل خير
والله رد حضرتك افادنى واسعدنى كتير
وجه فى وقته والف شكر على اسم الكتاب لانى كنت بسأل على حاجه زى كده قبل دخول النادى الصيفى بتاع الزهرات
وان شاء الله يكون فى ميزان حسناتك

ِِAdem El-Mahdy يقول...

السلام عليكم

عزرا اختنا

الكتاب اسمه
"كيف تصنع طفلا مبدعا"

غير معرف يقول...

والله انا خايفه يقبلوكى وتضيعى مستقبل الاطفال وتبقى جنيتى حتى على الجيل الجديد..ده اعتقد ان الاطفال هما اللى هيعلموكى مش انتى خلى بالك من نفسك ..وركزى فى مذاكرتك وسيبيها على الله ..ولما تخلصى ابقى فكرى فى اى حاجه تانيه وعلى الله اشوفك فاتحه النت تانى ..ذاكرىىىىىىىىىىى ارجوكىىىىىىىى "ادعى لى" R

روينا يقول...

ِِAdem El-Mahdy
جزاك الله خيرا

روينا يقول...

غير معروفه اللى هى صحبتى
رونى يا حببتى سماح المرادى
ده انااساسا بذاكر انتى فهمتينى غلط
ده بس اسمه ترويح عن النفس
اصل انا زهقت وهطق من الفصل بتاع السمبلكس
والله ما فاهمه حاجه منه خلص بس البركه فيكى يارنرونتى ياروح قلبى (لحد تشرحي لى بكره بس)بقا انا هبوظ الجيل الجديد طيب لما اشوفك

اوعى تفكر يقول...

هههههههههههه
كل ده حصل
بس تصدقى ممكن يتصلوا بيكى
ده انتى عندك خبره كبيره اوى مع الزهروات
مش مهم خيرها فى غيرها
وان شاء الله تعيشى وتكسفى

حـــــدوتـــــة يقول...

السلام عليكم
والله انا معجب بتفائلك فى الحياة
انتى لسة فى الكلية وعايزة تشتغلى
ده ايه الجمال ده
بما انك فى كلية التجارة
يعنى كلية العظماء
يعنى كلية المليون عاطل
انا هنصحك نصيحة لوجه الله
بما انى خريج تجارة برضة وليا خبرة كبيرة فى هذا المجال

اول حاجة تلحقى السنة ولا الاتنين اللى فاضلين وتحولى تجيبى تقدير
تانى حاجة تخدى كورس ICDL
تالت حاجة تخدى كورسات انجليزى

بعد التلت حاجات دى تبدئى تفكرى فى الشغل
لو معاكى واسطة هتروحى مكان كويس
لو معكيش هتروحى مكان معفن

او ممكن توهبى نفسك للعلم وتتدربى فى مكتب محاسبة ذي ما انا بعامل وتخدى 100 جنية فى الشهر وساعتها هتخدى 200 جنية من ابوكى تحطيهم على فلوس المكتب عشان تعرفى تكملى الشهر

ولا حول ولا قوة إلا بالله

سلالالالالالالالالالالالالالالالالالالالالالالالالالالالالالام

Abo 7anf يقول...

السلام عليكم
اولا حمدالله على السلامه
زياريت تكون الامتحانات عدت على خير
ونلاقى كدا تقدير حلو
وبعدين اكيد اخوكى عندوا حق
وسيبك حتى لو متصلش المهم شرف التجربه
وربنا يوفقك

الفاتح اليعقوبي يقول...

السلام عليكم
هههههههههههههههههه

الشغل مع الاطفال له طعم اخر وكفاية الزهروات علي حضرتك وبعدين يوسي ماس ايه يااستاذة حضرتك ان شاء الله هاتبقي خريجة تجارة يعني كلية الناس اللي مبيغلبوش اللي سالكين في كل حاجة
في راي حضرتك شدي حيلك في الكورسات وبعد التخرج ان شاء الله ربنا يوفقك عشان محدش يعرف يكلمنا واحنا رايحين الانتر فيو
والسلام

Unknown يقول...

ههههه
ما شاء الله تجربة مفيدة جدا ,والله في حكاية الشغل والبحث عن الشغل الواحد بيشوف العجب متستغربيش هتقابلي الحجات دي كتير
بس نصيحه مني خليكي في الكلية شوية اقعدي سنتين زيادة اهو ترفيه عن النفس
وخروجات احسن من قعدة البيت
بهزر طبعا
بس فعلا ركزي في الكورسات هتنفعك جدا ,اكتر حاجه بندم عليها اني مهتمتش بالكورسات بتفرق كتير فعلا
وخيرها في غيرها
جزاكم الله خير

روينا يقول...

اوعى تفكر
لا خلاص مفييش امل
وحتى لو اتصلو انا مش هواااااافق
وهمما اللى خسرانين

روينا يقول...

حدوته
الله يبشرك بالخير بقا كل ده عشان اشتغل اشي كورسات وكمان اجيب تقدير
انا ان الشغل مجاش لحد عندى ووقفو يتحيلو عليا غير كده مش هشتغل
اه منا لازم اكون مختلفه عن المليون عاطل
شكرا لزيارتك

روينا يقول...

Abo 7anf
امتحنات ايه اللى خلصت ده لسه بنقول يا هادى
وعلى فكره انا بداءت اقتنع براى اخويا
شكرا لزيارتك

روينا يقول...

الفاتح اليعقوبي
وعليكم السلام
اه والله كفايه الزهرات واللى بعمله فيهم
كمان هروح على العيال التانيه
وبعدين انا قلت اكسب ثواب فيهم واخليهم يستفيدو من عبقريتى بس هما اللى هيخسرو
اما حكايه الكورسات اللى بعد كليه التجاره فمليش فيها خاللص ده انا هجيب وكسه للحته اللى هشتغل فيها

روينا يقول...

الفاتح الجعفرى
انا والله بفكر فى حكايه انى اخد السنه دى فى سنتين يعنى هتخرج اعمل ايه
وبعدين انا بحب اتقن كل حاجه بعملها
وبعدين يعنى االلى خدوو قرصات اشتغلو
كله او معظمه كوسه

ده البنك قبل ما يتبنا بيكون معروف مين اللى هيشتغل فيه حتى وظيفه اللوفيه بتكون محجوزه لعم عبده

KHALED يقول...

هههههههههههههههههههههههههه

روينا العزيزة

فكرتينا بأيام المقابلات والقولون العصبى .. والكبسات اللى كنا بناخدها
وشكرا سيب تليفونك ......

عموما نصيحة من أخ أكبر ..
خلى مؤهلاتك قوية فى اللغات والكمبيوتر
وحاتلاقى شغل بسهولة وحاولى تشتغلى فى مجال دراستك ..

تمنياتى لك بالتوفيق

روينا يقول...

Khaled Farag
جزاك الله خيرا على مرور حضرتك


وانا اللى كنت فكره انه لما قال لى تليفونك ده هو اللى مكتوب
قلت خلاص اكيد قبلت فى الشغلانه وهيعبرونى وهيتصلو
يعنى كلهم بيقولو كده شكرا على المعلومه دى

ساره عمر يقول...

معلش يا روينا تعيشي وتاخدي غيرها
بس خلي بالك ان في البحث عن شغل لازم هتواجهي مواقف من دي كتيييييير متعديش بكره تتعودي
المهم مادام انتي في تجاره تدعمي نفسك بكورسات زي ما الكل قال وربنا يوفقك ويوفقنا
ملحوظه
اول مره ازور المدونه وهي بشكل عام لذيذه

Hossam Nasr يقول...

ساعات قليلة لنتحد ولو لدقيقة
الساعة الرابعة عصراً نرسل رسالتنا الأخيرة
http://kawlansadida.blogspot.com/2008/05/blog-post_24.html

26.05.2008

tamer.sala7 يقول...

طيب لما انتي لسة صغيرة كدة عايزة تتبهدلي ليه ؟؟

ابراهيم يقول...

انتي اكيد الهزار دة صفة من صفاتك الشخصية
انتي المفروض متمسكيش زهرات لانحضرتك مش ممكن تديري حلقة من كتر الهزار
بس عموما الاولاد هيطلعو مبسوطين زينا كدة
ادعوكي لزيارة مدونتي واتمني التواصل الدائم بيننا

ammar يقول...

هههههههههههه
وطبعا المدير قالك سيبى رقم تليفونك وهانتصل بيكى
ههههههههههه
على فكرة موضوع الشغل ده بسيط جدا
وانا هافيدك بما انى فى تجارة انا كمان
الموضوع كله حوالى من 20 ل 25 الف جنيه
شوية كورسات انجليزى على كمبيوتر على اعداد محاسبين
ودورة كده اسمها سى ام ايه
وفى الاخر يطلع شغل المحاسب حرام علشان فى شبهه
ههههههههههههههه
تحياتى
عمار

روينا يقول...

حنين
منورانا بزيارتك لينا
والف الف شكر على رايك اللى فرحنى على مدونتى ويارب تكون مش اخر زياره
وان شاء الله هعمل بنصحتك

روينا يقول...

tamer.sala7
انا قلت ابتدى من بدرى جايز افلح واشتغل
وشكرا لزياره حضرتك
هو سن حضرتك باالارضى ولا على القمر

روينا يقول...

ابراهيم
ربنا يستر ويخلونى اكمل مع زهرواتى
لان الظاهر بدءو يخافو عليهم منى هما كمان بس على مين وراهم وراهم
جزاك الله خيرا

غير معرف يقول...

السلام عليكم
أخت روينا أولا انتى قطعتى الامتحانات والعهد اللى كنتى أخدتيه انك تزاكرى
ثانيا انتى غلطانه كان ممكن تعملى أكله من أكلاتك الجميله وتاخديها وتقدميها للمدير وقولى انك هتأكلى الأطفال من أكلاتك العبفرية والمناسبة لعبقرينو
أكيد كان هيفرق كتير
يلا حظ أوفر فى مقابلات اللى جايه

روينا يقول...

ammar

وايه لزمتها الدوخه االلى ميعلم بيها الا ربنا دى
ان مكنش الشغل يجى لحد عندى مش هشتغل
يعنى هفرق ايه عن المليون عاطل
كله هيقعد على الرصيف يستنى
جزاك الله خيرا على زيارتك

روينا يقول...

عمر المصرى

اولا:مذاكره ايه ده انا زهقت ومزكرتى زى قلتها لانى مش فاهمه حاجه خالص ربنا يستر
تانيا: ياه ياريت كان الفكره دى كانت جت فى بالى ده لو كنت عملتها كان المدير كتب لى تنازل عن مكانه لانى هكون اولا منه بالعبقريه
ان شاء الله متعوضه

.:.-=- ELGaZaLy-=-.:. يقول...

هههههههههههههههههههههههههههههه


لا طبعا خسرانين ..هو فى كدة ...اكيد خسرو كتير يا شيخة..

ربنا معاكى وتنجحى يارب...

وبصى لما حد يسالك خدتى كوزرسات قوليلة ايوة واخدة كورسات ويندوز وانترنت وقوليها بالفم كدة وما السائل باعلم من المسئول غالبا.,..

ربنا معاكى

احساس لسه حى يقول...

عزيزتى

ممكن اقول يا خرب بيت شيطانك

بجد الحوار ساخر قوى

وكلامك فيه حلو قوى

وبسيط وسلس

بس مش حرام عليكى عاوزه تخدى مكان بيتسابق عليه ناس طلع عينها قبليكى

اصبرى شويه تخلصى

وهتعملى السى فى وتمليه كويس

بس خدى كام كورس فى كام حاجه

علشان يتملا على حق


خيرها فى غيرها

ربنا يوفقك وتشتغلى اللى تتمنيه

قريبا ان شاء الله

تحياتى

سلام

سكر النبات يقول...

يا نهار ابيض
عايزه تروحى تدرسى للنشأ الجديد العبقريه
يعنى مواهبك كلها هتتورث للاطفال
يعنى هيكون عندنا مجموعه كبيره من ذوات العقل العبقرى (تربيه الست روينا )
اااااااااااااه
المدير ده اكيد هيتصل
اصله مش هيفوت عليه فرصه زى دى
اراهنك انه كان معجب جدا بالعبقريه اللى خارجه من عنيكى و انتى بتقوليله على فكره اوضه الفران
انا هجبلك حسوكه تدربى ( حسوكه ده ابنى و فلذه كبدى ) حتى لو مقبلوكيش
هيكون درس خصوصى
علشان يكون عبقرى زى صديتى الفظيعه روينا
ربنا يوفقك و الراجل يتصل

إخوانى حتى النخاع يقول...

ههههههههههههههههههههههههههههههههههههههههههههههههههههههههههههههههه.

انا فضيت خلالالالالالاص علشان خلصت إمتحانات


بس بجد البوست حلو

ولو اناو الله مكان المدير دا مش عارف كنت هعمل إيه


هههههههههههههههههههههههههههههههههههههههههههههههههههه

وكمان قاعدة تقوليلى الى انتا مش هتعرف تقعد على المذاكرة كتير .. وقاعدة تقولى الى انتى خلاص هتروحى بيت تانى تذاكرى فيه


دا انتى خلالالالالالالالاص .. أخذتى علامة النت


ثم إيه الى جاب تجارة للأطفال ؟؟
عاوزة مثلا تعلمى الأطفال شغل البسبس كات ؟؟



المهم ذاكرى انتى .. سيبك من النت دا
النت دا للناس الى مخلصة .. بسسسسسسس

عدنان أحمد يقول...

السلام عليكم
هذه اول زيارة لمدونتك
و ان شاء الله ما تكون الاخيرة
انا لا اخفي اعجابي الشديد بالمدونة
و اهتمامك الزائد لتوضيح كلامك بالصور

تحياتي
عدنان

موناليزا يقول...

روينا حبيبتى ولاتحطى فى دماغك وذى ما اخوكى قاللك هما الخسرانين

ام يحيي يقول...

يحيي زهق من كتر انتظاره جنب التليفون


وبيقولك

انتي لسة عندك امل ....ياخلتو!!

Saad El-Shater يقول...

يمكن يكون المدير مستني لحد ماتخلصي امتحانات ويتصل علشان هوا يأمل في جيد السنه دي

ٍSOU يقول...

تصدقى مالوش حق :))
خليكى قاعدة جايز المعجزة تحصل :))
ماتزعليش انا بهرج
على الاقل اخدتى خطوة و عملتى تجربة حتى لو فاشلة بس اكيد اتعلمتى منها
ربنا يوفقك

rtrcbh يقول...

السلام عليكم ورحمه الله وبركاته أنتى فعلا تخليكى جنب التلفون هما هيتصلوا يقبضوا عليك
ههههههههه
ربنا يكرمك يارب
ولا تيياسى يافتاة الاندلس فبنت الاندلس لا تياس ولا تتعجل الامور وتنظر لها بعين الحكمه وقبل ان تقدم على شىء تعد له العتاد

روينا يقول...

ELGaZaLy
نورتنا بزيارتك
اه طبعا هما اللى خسرانين
وان شاء ان كان فى مره تاانيه
هبقا اعمل بنصيحت حضرتك

روينا يقول...

احساس لكن حى
جزاك الله خيرا
والحمد لله ان الحوار عجب حضرتك
ويارب الاول اخلص من الامتحنات
وبعدين ابقى افكر فى القرصات
تقبل تحياتى

روينا يقول...

سكر بنات
اولا هو انتى مش مكسوفه من نفسك يا بت
مبتساليش ليه انا علطول بقول للبت ميمونه توصل لكم السلام
يلا العفو عند المقدره
وبعدين ابنك ايه يا بير....
بلاش اكمل ده اسمه حلو اوى سحلوكه
اوعى يكون يقرب لعمك سحلول

وبعدين شكل المدير مخدش باله من العبقريه اللى طالعه من عينى الظاهر
افتكرها حول



ادعيلىىى

روينا يقول...

اخوانى حتى النخاع
كنتم كذالك من قبل حتى منى الله عليكم
واللى اديك يدينا يا سيدى
هانت وقربت اخلص كلها 14يوم
وبعدين انا جوبت الاسئله
فين الجوايز

روينا يقول...

أسير حبيبتي
اسعنى رايك جدا جدا على مدونتى المتواضعه
ويارب تكون فى ميزان حسنتنا
ومنورنا بزيارتك الاولى ويارب متكنش الاخيره

روينا يقول...

موناليزا
ازيك اخبارك ايه
طبعا هما اللى خسرانين ومسيرهم يندمو ويجو يبوسو القدم
انى اشتغل معاهم

روينا يقول...

ام يحيى
دايما مكسره مجاديفى انتى والواد يحيى ابنك
وقولى ليحيى يروح يشوف له عمليه استشهاديه
ومنها يتشفع لنا ومنها نخلص منه

روينا يقول...

saad khirat
اولا انا فرحانه بزيارتك لمدونتى جدا جدا
ويارب يطمنا على والد حضرتك
والف الف سلامه عليه
والله علطول بدعيلهم
وصل سلامى للابطال

روينا يقول...

SOU
اه والله تجربه فاشله بس مش ليا
ليهم هما
منورانا بزيارتك ويارب متكنش الاخيره

روينا يقول...

أبويحيى وادم
ربنا يستر ويخلى كلامنا خفيف عليهم
وجزاك الله خيرا على الكلام الجميل ده

شرفتنا بزيارتك

روح يقول...

هههههههه
اضحك الله سنك
دمك خفيف
وماتخافيش
ربنا ان شاء الله
يكرمك بشغل كويس
يحفظك ويصونك
تحياتي

*سمر* يقول...

على العموم هما الخسرانيين فعلا ..
واهو على الاقل يكفيكى شرف التجربة..وفعلا الانسان مبيتعلمش ببلاش ...
الصراحة والتلقائية شىء كويس ..طبعا ...بس ده ميمنعش ان يكون فيه شوية حرص وتدبر فى الكلام ...

على لاعموم ربنا يكرمك..واهتمى حاليا باثقال مهاراتك.سواء كمبيروتر او لغات..خاصة انى تجارية زى ..والحاجات دى مهمة اوى
دمتى بخير يا قمر :)

Hosam Yahia حسام يحيى يقول...

ههههههههههههههههه

ربنا يكرم حضرتك ويدوكى الشغلانه دى ان شاء الله

وتمسكى مكان المدير كمان

حلوه اوى الصور اللى فى المكوضوع

تحياتى

من انا؟؟ يقول...

هههههههههه
يخرب عقلك يا شيخه
على راى سكر النبات عايزة تروحى تدرسى للنشا الجديد
يا شيخه هيه البلد ناقصه معاقين قصدى عباقره

بس متقلقيش الراجل ده اكيد هايعرف امكانياتك وهايكلمك وبكره تقولى مدونه من اجل الحب قالت

mohammed alsha3r يقول...

السلام عليكم

الاسلوب جميل وجيد فى العرض .. خلصت البوست من غير ما أمل

بس انصحك

تاخدى بقى كورسات كمبيوتر وتنميه بشريه فى التربيه وتؤهلى نفسك

ولا نفقدى الثقه في الله أولا وفي قدراتك ثانيا


محمد الشاعر

إخوانى حتى النخاع يقول...

السلام عليكم


اتكتب إسمك فى أخر بوست


ويلا اكتبيلى عاوزة البانر ازاى ؟؟

وركزى حبة فى المزاكرة

علشان شكلك هتنزلى بكل المواد السنة دى
ههههههههههههههههههههههه

ِِAdem El-Mahdy يقول...

السلام عليكم
فتاة الاندلس

انوه سيادتك انى قد مدونة ادم المهدى قد عادت للحياة

و عادت تكتب و تنقذ و تحلل

ارجوا متابعتها يوميا
و شكرا

walaa rizk يقول...

روينا

تجربه على فكره هاتفيدى جدا

فكرتينى بالانترفيوهات

هههههههه

والله الواحد بيحصله حاجات مش بتبقى فى حسابنه

خير

خليكى مع الزهروات واديها شويه كورسات فى مجال تنميه مهارات الأطفال لو انتى حبه المجال

لكن لو لا

عليك بالكورسات الخاصه بتجاره وادراه الموارد البشريه

وربنا معاكى

Unknown يقول...

متخديش الموضوع بشكل سلبي..
كلها خبرات بتستفيدي منها..
يعني الوقتي لما انت تخلصي امتحانات باذن الله هاتبقي عارفه ايه ناقصك وتكمليه..
تاخدي دورات كويسه وتاهلي نفسك بشكل مظبوط في المجالي اللي عاوزه تشتغلي فيه..
ومفيش مانع تقري شويه عن موضوع المقابلات الشخصيه بجانب طبعا المقابله اللي انت عملتيها دي هاتشجعك جدا المره الجايه.. فلو كانت ركبك بتخبط في بعضيها اول مره بسرعه 40 حصان المره الجايه هيابقوا 20 حصان بس وهكذا نازل فنازل لحد مانوصل لحصان واحد .. :)

ربنا يوفقك وعلى فكره مدونتك دمها خفيف
تحياتي

Unknown يقول...

والله ربنا يوفقك بس ؟؟؟؟؟؟؟؟؟؟؟؟؟؟؟
اعملي التليفون فيبريشن
وإن شاء الله حيتصلوا بيكي زي النهاردة كمان 10 .. 145 سنة
متقلقيش انا مبحبطكيش ولا حاجة
بس تبقى أنت أكيد ... أكيد في مصر

غير معرف يقول...

السلام عليكم
الأخت الكريمة
اكيد لأنك لسه ما خلصتيش هما مش عاوزيين يعطلوك عن مذاكرتك ..
يعني ممكن يوم 16 سته كده تقعدي جنب التليفون .. عشان لو اتصلوا ولا حاجة انتي اللى تردي عليهم
تمنياتي لك بالتوفيق
ونصيحة من أخيك
حاولى تستغلي وجودك على النت بأخذ كورسات مجانية عن اللغة أو الحاسب او حتي الفوتوشوب .. أيام الدراسة بها فراغ كبير هتستفادي اكيد لو ملأتيه بالتعلم من اجل فرصة عمل واعدة
تحياتي .. زيارتكم اسعدتني

سيف الهوا يقول...

السلام عليكم
ازيك يا روينا يا حبيبتى والله ضحكتينى وفرحتينى بتجربتك دى تجربة عظيمة تصدقى هما اللى خسرانين ميعرفوش خفة دمك وشطارتك فى المطبخ كنت هاتطلعى العيال سواء بنات او ولاد بريمو فى المطبخ من صغرهم انتى لو كنتى عزمتيهم على أكلك أكيد أكيد كانو هايخدوكى بس هايخدوكى على ...... على الشغل طبعا
ههههههههه وحشتينى والله روينا ربنا اكيد مقدرلك الخير وان شاء الله ربنا يكرمك فى الكلية وتجبيى تقدير عالى ويكرمك بشغل كويس *** سلام يا عسل

على الزيبق يقول...

الدعوة لحظر الحزب الوطنى

لماذا لا نقوم بعمل حملة قومية من أجل حظر وحل ما يسمى بالحزب الوطنى
ولماذا لا نقوم برفع دعوى قضائية امام المحاكم المختصة
نتهم فيها الحزب الوطنى بأنه حزب يهدد الدستور ويعطل الدستور
وبأنه حزب يزور ارادة الشعب ويستغل ما لديه من سلطات ونفوذ من أجل البقاء فى الحكم لأجل غير مسمى


قد يقول قائل من الصعب أو من المستحيل أن يحدث هذا الأمر ومن المستحيل أن ننجح فى حظر الحزب الوطنى
وانا غرضى ليس حظر الحزب كأجراء قانونى .. وإن كان هذا ممكن .. ولكن غرضى هو مهاجمة هذا الحزب الفاسد الفاشى الفاشل المزور
مهاجمته قضائياً وشعبياً وإعلامياً
فلنتخيل سوياً هذا الخبر على صدر صفحات الجرائد وفى مقدمة النشرات الأخبارية
قوى حزبية وشعبية واعضاء معارضين بمجلس الشعب المصرى
يطالبون بحظر الحزب الوطنى الحاكم ومحاكمة اعضائه

ربما لم تسمع عنى يوماً يقول...

سلام عليكم

اضحك الله سنك

تجربه نستفيدي منها ان شاء الله

ملحوظة:
الصور معبرة جداً

دعاء مواجهات يقول...

هههههههههههههههههههههههههه

واللهى مش وحش انك تشتغلى ف الدراسة

بس يعنى فى حاجة تقرب لشغلك مثلا

بس هى دى الحكاية

وبعدين سيبك منهم انتى اكبر من كدة بكتيييير

صدقينى حاسة بيكى

مستنيااكى تنورينى
بيس

رامــــى حجــــاج يقول...

انتى لسه مكبوسة يا روينا

ما تسيبك من الشغل والحاجات دى بقا و ترجعى للمدونة

ربنا ينجحك و يخيب ظن الواد مصطفى الإخوانى ده

بنت الصالحين يقول...

هههههههههههههه

عسسسسسسسسسل ياروينا

ربنا يكرمك باذن الله قريبا والله اعلم جايز يكون مقدرلك انك تشتغلي في المكان ده


كله خير ان شاء الله

Call for coexistence يقول...

هههههه
يا حبيبتى
طيب متزعليش نفسك
لو انت فى اخر سنه
فى كلية تربيه انجليزى او رياضه او رياض اطفال راسلينى على الميل اللى هسيبهولك دا وربنا ييسر وتشتغلى فى ممركز صناعة العبقريه
alqassam_mylove@hotmail.com

alqassam يقول...

انا بجد ضحكت من قلبى والله العظيم وانا بقرا البوست دوت ربنا يسعدك يارب ..وياروينا استنى لما تخلصى الكليه بعدها تشتغلى مستعجله ليه ..ربنا يوفقك يارب

Unknown يقول...

>>هل يمكنني دعوتك لزبارة مدونتي المتواضعة جدا والمشاركة غيها بتعليقاتك ولمساتك
أتمنى تليبة الدعوة
في انتظارك
مدونتي هنا
http://kanyatklam.blogspot.com/

عودة(3awda) يقول...

لاتحزنى واعلمى أن تقدير مقبول تقدير الشعب المصرى كله واتمنى ان تقراى (دعاء المكروبين) وتقوليلى رايك

حملة ساندوا يقول...

ربنا يوفقك يارب
ويعين كل المكبوسين !

----

اسمحي لى ادعوك لزيارة مدونة حملة ساندوا

جزاكِ الله خيراً

جمعاوى يقول...

من تجارة لتربية طفولة !!!!!!

عادى ..

بتحصل

رامــــى حجــــاج يقول...

لقد عدت عوداً حميدا

و منتظرين عودتك العود الحميد !!!!

سيبك من التليفون و الكبسات دى بقا

و ابدأى

دونى تانى

غير معرف يقول...

ههههههههههههههههههههههههههههه
و الله انتي سكره
بس يا بنتي عادي و الله
هو اول انتر فيو بيبقي اسود كده عادي جدااااااااااااا
و نصيبك هتخديه متستعجليش
علي فكره بقي الشغل شيء و الدراسه شيء تاني خالص
يعني لا تقدير و لا حاجه بتفرق
بس انتي شوفي ايه مطلوب في السوق و ظبتي نفسك بسرعه
يعني اتعلميلك البرامج المطلوبه في اسرع وقت و اقبلي اول شغلانه تقبلك حتي لو مرتبها قليل كفايه عليكي الخبره و انك تكوني اشتغلتي و بعدها دوري هتتنقلي عالافضل شيء فشيء و ان شاء الله ربنا يوفقك ياعسل
وحشتيييينيييييييييييييييي

فارس الأزهر .. معاذ فتحى يقول...

السلام عليكم

حياكم الرحمن

تجربه جيده

وتقريبا نفس تجربتى

لكن انا كنت فى مجال تانى

ورفضونى

بس مش علشان انا اقل الحاضرين

الحمد لله كنت اعلاهم مؤهل

واقربهم للفوز

لكن فى الأمر اعتبارات اخرى

ربنا عالظالم

موناليزا يقول...

انتى فين ياروينا
طمنينا عليكى
يارب تكونى بخير

غير معرف يقول...

رحتي فين
اوعي تكوني بتصيفي و سايبانا قلقانين

alqassam يقول...

سنة اولى تدوين ...اهداء الى من احبهم واتعلم منهم ...جديد على مدونة القسام

طلاب من أجل مصر يقول...

هههههههههههههههههههههههههه

البوست جميل واجاباتك على المدير كانت أحلى

تقبلى مرورى

إخوانى حتى النخاع يقول...

انتى فين يا ستى ؟؟؟؟!!!

انتى اختفيتى ولا إيه ؟؟؟



شكلك لسا مكبوسة

يا ستى انتى فين ؟؟