حاجه على السرررريع

السلام عليكم ورحمه الله وبركاته

انا جيت بس همشى بسرعه لانى مشغوله جدا جدا

وهتعرفو انا مشغوله ليه دلوقتى

انا الحمد لله بقيت شخصيه فيرى امبورتنت

اه امال ايه هو حد زيى ابدا فى الدنيا

صدق اولاتصدق

انا مش مكبوسه ايووووووووووووون حصل اه والله حصل

الشغل اللى قلت لكم عليه قبل كده اتصل بيا

كنت خير اللهم خير قاعده فى حالى ولقيت التليفون بيرن

تررررن

اختى ردت على التليفون

اختى:السلام عليكم مين معايا

الراجل اللى لسه منعرفش هوا مين:وعليكم السلام ممكن اكلم الاستاذه روينا

اختى:الاستاذه روينا مين اه اه افتكرت ثانيه واحده

وجت جرى وهى بتضحك وتقول لى فى حد بيقول عليكى استاذه عايزك على التليفون

فستغربت ورحت اشوف مين الراجل الغريب اللى بيقول عليا على اخر الزمن ده

استاذه

انا:سلام عليكم ورحمه الله مين معايا

الراجل:وعليكم السلام انا المدير بتاع العبقريه اللى كنتى قدمتى عشان تشتغلى فيه


انا : ايه بتقول ايه انت متاكد انك انت قصدى اهلا بحضرتك

واختى كانت واقفه جنبي عشان تعرف مين الراجل اللى مش طبيعى اللى بيقول عليا استاذه روينا ده

لما عرفت قعدت تطنطت وجريت تقول لبقيت اخواتى اخواااتىالحقوووو روينا الشغل اتصل بيها والله اتصل

وانا قاعده ابرق لهم عشان يوطو صوتهم وقلت والله هوريكم لما اخلص الراجل هيقول عليا ايه دلوقتى عايشه فى سيرك

ولماقفلت التليفون طبعا قعدت اطنطت معاهم وكنت والله مش مصدقه نفسي خالص

ولكن طبعا تعرفون ان فى حاجه اسمها حسد ونق وقر والحمد لله اخواتى متخصصين فى

الحاجات دى

شهر اللاختى رقم 1:ماشي ياستى بتوع التجاره جلهم شغل قبل ما النتيجه تظهر وبتوع هندسه قاعدين زى خبيتهم

اختى رقم 2: والله الشغل ده معندوش نظر اكيد فى حاجه غلط

اختى رقم3:اه بقا يستى هتقبضى فلوس على قلبك كل اول شهر ماشي اللى اداكى يدينا ياسيدى

اخويا الوحيد اللى مليش غيره فى الدنيا:لاطبعا مش هتشتغلى مفيش حد هيوافق انك تسافرى عشان تتدربى


وأول مره اعرف فايده ان الواحد يكون عنده اخوات كتير ربنا يخليكم ليا

يااخواتى ياااااااااااااارب ولا يحرمنى من عيونكم ابدا ابدا على رائ اخويا

اللى عنده الحاسه الساسه

فعلا محدش وافق اسافرلوحدى السبع مرات اللى مفروض تدريب

عشان اشتغل( كنت حاسه انى باخذ موفقه السفرلاورباو الدول المتقدمه من غير محرم)

قلت لهم خلاص وصلونى انتم قالو لى ماشي

انا:لولولوللولى الحمد لله اخيرا هشتغل وابنى مستقبلى

قلت ان شاء الله بكره الساعه 11فوتو عليا عشان نسافر

العائله الكريمه:لحد الساعه كام

انا:لحد الساعه5بس

العائله الكريمه وبصوت منخفض وبكل تفاهم:لاوالله بجد لحد الساعه5بس ومين اللى فاضى يستنى حضرتك وفرح اختك الاسبوع الجاى وبعدين بقا مفيش حاجه اسمها شغل للبنات

انا:ايه امال كنت تاعبه نفسي وبذاكر طول عمرى ليه حرام بقا متقفوش فى طريق مستقبلى

العائله الكريمه :هههههههههههههههههههههههههههه

انا مكبوسه

ازيكم يا جماعه وحشتونى والله انا قلت اسيبنى من المذاكره ووجع القلب ده
واجى احكيلكم على كبستى اه والله انا انكبست
الموضوع من الاول انى هموت واشتغل وفى يوم من الايام واحده صاحبتى قالت لى انا جبتلك
شغلانه انما ايه روووووعه واللى كان نفسك فيها
انا طبعا طرت من الفرحه وكل اللى اعرفه واللى معرفوش قلت له انى هشتغل وللاسف نسيت
اذا بليتم فاستترو
المكان :عارفين اليوسي ماس اللى بيعلم الاطفال العبقريه
مش هوا ده ...حاجه شبهو اسمها عبقرينو
صحبتى قالت لى تعالى يوم الخميس الساعه2 قلت لها من 1 هكون عندك
والله كنت فرحانه اوى وقلت اخيرا هدرس للاطفال
بس انا بغبائي كنت فاكره ان اول مروح همضى العقد وهشتغل علطوووول
وجه يوم الخميس


دخلت وانا ايه منشكحه ووثقه من نفسي وفرحت اكثر واكثر لما لقيت المركز
على سنجه عشره قلت فى نفسى اكيد مظبطينو عشان انا جايه

لقيت خير اللهم اجعله خير بنتين غيرى متقدمين عشان يخدو مكانى

قلت حرام عليكم ده ظلم ظلم بس طبعا قلت فى سري

وخت فى جنابى وسكت

وقعدنا نتكلم شويه واكتشفت ان انا الوحيده اللى فى الكليه لسه

وكمااااااان هما خريجى تربيه طفوله وانا تجاره يعنى من الاخر مليش لزمه

قلت استهدى بالله يا روينا وامسكى نفسك واوعى تعيطى يمكن يكون لسه فى امل

وخليكى واثقه فى ربنا

وقعدت منشكحه

بس ملحقتش

لقيت بيدونى ورقه عرفت بعدين ان اسمهاcv

بس مكتوب حاجات غريبه اوى معرفتش اجاوب منها غير ثلاث اسئله اسمى وعنوانى وتليفونى

اه والله.منا لسه فى الكليه يعنى ولا ليا خبرات ولا كورسات ولا مهارات

المهم اول بنت دخلت وقعدت يجى ثلث ساعه

ومقلكوش بقا عليا كان قولونى مموتنى من الوجع

وجه عليا الدور

وانسو بقا كلامى عن الثقه بالنفس وكانت ركبى قاعده تخبط فى بعضها

لحد مجابت لى صداع من كتر التخبيط وضيفو عليهم القولون

يعنى من الاخر كنت عايزه دار مسنين

دخلت لقيت رجلين واحد المدير العام والتانى مدير برده

بس الحق يتقال كانو طيبين واطمنت خالص

اول سؤال اتسألتو انتى سايبه الورقه فاضيه ليه

انا: هو حضرتك متعرفش انى لسه فى الكليه

المدير: اه هو حضرتك اللى صحبتك قالت عليكى

انا:اى نعم

المدير:طيب خدتى قرصات قبل كده فى الكمبيوتر

انا:الصراحه لا

بس الحمد لله بعرف اقعد على النت والحمد لله عامله مدونه

وبعديها ندمت انى مقلتش انى عندى ايميل على الهوت ميل واميل على الياهو

وانى كمان بعرف ابحث فى الجوجل

يلا اهو الواحد مبيتعلمش ببلاش

المدير:ايه ده انتى عامله مدونه اوعى تكونى زى اسراء عبد الفتاح

وبتكتبى على سحلول(تصورو هو كمان عارف سحلول)

انا: لا لالا خالص انا اساسا مبعرفش اكتب يا سعادت الباشا

المدير:طيب ليكى خبره مع الاطفال

انا: الحمد لله انا معايا مجموعه زهرات فى النادى الصيفى بتاع نقابه الاطباء من ثلاث سنين

المدير: طيب لو طفل مكسوف هتعملى معاه ايه

انا : هقول له مالك هى القطه كلت لسانك

لو طفل طبيعى هيتكلم ويقول لا انا القطه مكلتش لسانى

اما لو الطفل تنح لى هقول له عارف لو متكلمتش هحطك فى قوضه الفيران

طبعا مقولتش للمدير على قوضه الفيران

المدير : هتخلصى امتحنات امتى؟

انا:يوم 16سته

مش عارفه كنت حاسه ان المدير كان على لسانه يقول لى طيب ايه اللى جابك

مفروض ان احنا هنستنى حضرتك عقبال متخلصى امتحانات

طيب جبتى ايه فى تقديرات السنين اللى فاتت

انا: الحمد لله مقبول ومره جبت فى ماده جيد
المدير :بدون تعليقققققققققققققققققققققققققققققققققققققققققققققققققققققققققققققققققققققققققققققققق

وروحت البيت وكنت طبعا عارفه الرد من قبل ما المدير يقول لى

والبركه فى البيه اخويا رفع فى معنوياتى

ولقيتو بيقول لى هما اللى خسرانين

قلت له الله يا خليك يا جابر بخطرى

قال لى ده ممكن يستغلو موهبك وتمسكى البوفيه

ولا لو طفل من الاطفال خد الكورس ومرضاش يدفع الفلوس

يقعدوه معاكى ساعه واحده وهيكون نسي كل الكلام اللى خده وكمان مش

هيكون فاكر حتى اسمه

بس انا لسه عندى امل وهقعد جنب التليفون جايز فى يوم من الايام يعرفو قيمتى ويتصلو

ولا ايه رايكم

اوعو تنسو تدعولى

خلاص قررت اسيب البيت وهعزل شهر واربع ايام بالتمام والكمال ان شاء الله

عند عمى اى نعم هو فى الشارع اللى ورانا بس برده هعزل

هتوحشونى بس كان لازم اعزل واسيب البيت والنت عشان اعرف اذاكر

اصل البركه فى اخواتى بشجعونى اوى اوى على المذاكره فانتم طبعا عارفين انى

مبحبش المذاكره فخفت يبوظونى فبقول لخواتى سيباها لكم مخضره

ادعولى بجد واوعو تنسو كله يدعى لبعض

عشان نخلص بقا من التعليم ده حاجه تخنق

واى حد فاته موضوع من اللى كنت كتباهم قبل كده يقراءه

واى حد هيزور مدونتى لاول مره بقول له منورنا ومفرحنا واوعى تنسي تقراء القديم

نوبك ثواب ده المواضيع القديمه غلبانه

زورونا ولو مره فى الساعه تعالو زورنا باى باى

لا اله الا الله اشوفكم على خير

السبب ايه؟؟

السلام عليكم ورحمه الله وبركاته


بدون مقدمات مش عايزين نضيع وقت يمكن


ننقذ واحده او اتنين من المصير المحتم


(حلوه المحتم ديه)


مش ملحظين ياجماعه ان الطلاق زاد جدا حولينا


طيب لو مش ملحظين الطلاق يبقا اكيد وخدين بالكم بفشكله الخطوبات

طيب ايه السبب لو جادعين انا هقول لكم


هو فى اسباب مش سبب واحد

سبب اساسي والباقى فرعى

السبب الاساسى ان البنات للأسف مبيجوش ليا يخدو كورس الطبيخ


يا جماعه قلت ميت مره قلب الراجل فى بطنه


انتم احرار بس متقولوش بعد كده انى مفطمتكمش على اللى فيها

هقول لكم الحكايه من الاول




الواحد لما يحس انه كبر وعايز يكمل نصف دينه ويتأهل


شوشو بقا ميسيبوش فى حاله ويسيب كل الوسوسه اللى وراه ويفضى لصاحبنا


اسمعو الحديث ده


قال رسول الله صلى الله عليه وسلم


(ان ابليس ينصب عرشه على البحر ثم يرسل بجنوده من الشياطين ليغووا بنى ادم فيأتيه

من يقول لازلت بفلان حتى زنى والاخر يقول لازلت به حتى قتل وهو يقول لهم لم

تفعلو شيئا حتى اذا جاء به من يقول لازلت به حتى فرقت بينه وبين زوجته يقول له ابليس

انت انت ويقربه منه ويدنيه)صدق رسول الله صلى الله عليه وسلم

فطبعا كل شيطان له طموح واهداف عايز يحققها

فبيبتدئ من اول الطريق من قبل حتى الخطوبه قبل ماالفاس تقع على الراس

بيفقد الشيطان عند الزواج ثلثى مساحته بالتأثير على الانسان


صاحبنا:الواحد عايز يدخل دنيا


شوشو: يدخل دنيا ايه بس ياكابتن ده انت على نياتك اوى


ده الجواز هينهي لك دنيتك ده الجواز مسئوليه و......والخ الخ الخ


فى واحد ممكن يقتنع بالوسوسه والزن ده ويسمع كلام الواد شوشو


سعتها مش هيكون صاحبنا ولا نعرفه


اما صاحبنا مش هيتأثر بشوشو صديق السؤء ده




وهيخطب


بس طبعا شوشو مش بيعرف حاجه اسمها الفشل هيفضل وراه



وللأسف هيبتدئ الواد شوشو يكسب كام جوله وصاحبنا


مش واخد باله خالص مهو مشغول بأغانى العنب والبلح وشغال تنطيت هو وصحابه مهو فرحان


بليله خطوبته


ومش واخد باله انه مفروض يبتدئ دنيته الجديده بطاعه مش بمعصيه


ومش هقول على بقيت الجولات التانيه اللى شوشو كسبها لانكم اكيد بتسمعو عنها


يقعد بقا يسبل ويغمز لخطبته اه مهو عنده حق مش هتبقى المدام بتعته


وصحابنا برده مش واخد باله ان من تعجل بشئ عوقب بحرمانه




نتكلم بقا شويه عن صحبتنا


شوشو بيكون واقف معاها زى ما وقف مع خطيبها بالضبط


الصراحه شوشو مقصرش فى شغله خالص الله يلعنك ياواد ياشوشو


طبعا لو الواحده سمعت لزنه ووسوسته مش هتكون صاحبتنا


اما اللى هتنصح له هتبقى حبيبتنا


حبيتنا بقا ياروح قلبنا بتكون رسمه خطط عشان تعيش سعيده


يعنى مثلا تكون ناويه لحماتها انها تعاملها كويس عشان ربنا يكرمها


ملهاش دعوه بكلام البنات مع حمتهم اللى مطلعين عيون بعض


اللى كانت صحبتنا:انتى هتخدى شقه فين


حبيبتنا:فى الدور الاول فى شارع امير
اللى كانت صحبتنا رقم1: والله يختى انتى اللى اميره وعلى نياتك


كنت تخديلك شقه فى الدور13ولا15 عشان حماتك تفطس ومتعرفش تقعد عندك ابدا

اللى كانت صحبتنارقم2:لا وحياتك يارقم1 بلاش تخليها تغلط نفس غلطتى انا خدت شقه فى
الدور9 وكنت فاكره نفسي فزلوكه وان حماتى عمرها مهتعرف توصلى لاكن يختى كانت بتيجى وتقعد شهر بعدها تستريح من السلم
طبعا حبيبتنا مخدتش فى بالها كلام الناس الوحشين دول

وصممت انها تشيل حماتها فوق دماغها

طبعا مش هيا اللى ربت خطبها وخلته راجل وهى اللى الجنه تحت اقدامها

وهتبقا تيتى لعيالها

وحبيتنا طبعا عارفه ان كما تدين تدان يعنى مسرها هتبقى حماه

فى حموات بقا

بتكون زى العسل وفي حالها ويوم متقول كلمه بتكون نصيحه او رائ

مش امررر

دى بقا هتبقى حبيبتنا

اما اللى هتكون بتشتغل مع شوشو فطبعا ولانعرفها

بس هقول لكم بعض مواقفها

اول مايروحو يشترو الشبكه يكون همها كله مين اللى هيركب قدام جنب المحروس

ابنها وطبعا تجرى جرى تفتح الباب وتقعد (فاكره نفسها فى 2/4)

وحبيبتنا ياعينى تتضايق شويه صغننين

مش عشان مقعدتش قدام لاالحمد لله هى بتشوف من ورا ونظرها مش ضعيف

بس اتضيقت لانها كانت ناويه اساسا تقول لحماتها تقعد قدام

انا والله بستعجب من الحموات اللى بيكونو ناوين نيه سودا لمرات ابنهم

ليه كده والله البنات غلابه وعيزين يعيشو

وبعدين لو غيرانه ان البت هتأخد المحروس ابنك ضناكى

مسمعتيش ان اعز الولد ولد الولد

مش نفسك فى قرد صغنن يقول لك يا تيتا

المهم

خلاص صحبنا وحببتنا هيتجوزو

بس بعد ايه

يكون كل واحد فيهم شايل من التانى فى قلبه وساكت

وخللى الليله تعدى على خير

انا متهيقللى ايام زمان يوم الفرح ده بيكون فرح بجد

ويكونو لسه فى بدايه حياتهم ولسه متخنقوش خالص

اما الايام دى بيكونو طقين من بعض

اه نسيت اقول لكم ان فى بنات بيكونو محظوظين جداجدا

وربنا رزقهم بدل الحماه اتنين وثلاثه واربعه

اخوات المحروس

مهى نقصاهم ويا سلام لو كان المحروس وحيد على البنات

يقعدو يدخلو ويحشرو مرخيرهم فى كل كبيره وصغيره ويلا

الجدع اللى يولع اكتر من التانى

ملحوظه

(يعينى عليك يا اخويا اصل نسيت اقول لكم انه وحيد على اربع بنات

طبعا بما انها حرب بين الحماه ومرات ابنها

فطبعا هتقعد تراقب العدو عن قرب

وطبعا حمات حبيبتنا صحتها حديد ومهمهاش طلوع السلالم

وشرفت حبيبتنا

انتم طبعا عارفين ايه اللى هيحصل

انت يا استاذ مراتك عملت وسوت فيا.......

انت يابعلى امك عملت وسوت فيا.....

وطبعا الام ياناس دى الام

وهيجى على مراته وهيديها على نفوخها

وطبعا النهايه معروفه

الطلاق

اما حببتنا وصاحبنا نسيو ان ابغض الحلال عند الله الطلاق

ونسيو ان ما بينهم عيال

وطبعا العيال هيطلعو معقدين وحالتهم حكايه لوحدهم

متنسوش تباركو لشوشو

مبروك ياشوشو كسبت الجاوله

اخيرا جبت الديب من ديله

النتيجه ظهرت الحمد لله والشكر لله والله انا مش مصدقه نفسي مش عشان انا غبيه بعد الشر
لاعشان انا مبفهمش حاجه من مناهج الكليه الملغبطه دى وطول عمرى مبحبش الحساب ولا الانجليزى
بس لحد دلوقتى بسأل نفسي انا دخلت الكليه دى ليه الحمد لله (الخيره فيما اختاره الله)
بس بجد بعد الشر يعنى لو اشتغلت هجيب وكسه لاى بنك هشتغل فيه
بس خلينا نرجع لموضوعنا انا نجحت لولولولولولولولولولولولى
وتخيلو جبت تقدير ايه !!!
مقبول اه والله قولو ماشاء الله وكفايه عيون صفره

ملحوظه صغنططه :هو

اصل

يعنى

انا

منجحتش صافى بس متتخضوش دى ماده واحده على الرفع وان شاء الله

درجات الرأفه هتظبطنى بس

وده لوحده انجاز كبير الحمد لله والشكر لله هو حد كان طايل

معلش يا شعب مصر

انا اسفه اتاخرت عليكم وعارفه ان حلتكم صعبه من غيرى بس الكمبيوتر خرب
فلما يتصلح اوعدكم ارجع لكم تانى
متخفوش واصبرو انا ان شاء الله جايه تانى
ومش هتخلى عن وجبى تجاهكم يا مصريين

سلام دلوقتى وكفايه كتابه لان الكمبيوتر بقا صوته زى الجرار
وبقا سريع اوى مش لحقه احصله
واخواتى لو صحيو هيموتونى لان فتحتو وهو بايظ
والله نفسي ارد على التعليقات واقرآء الجديد فى المواضيع بس هموت من الجرى من كتر سرعه الكمبيوتر

لا الله الا الله

وهننصر اسلامنا

حد فينا جاع قبل كده ؟


ولو جعنا جعنا قد ايه؟


ولو جعنا سبب جعنا ايه؟

1_انا عن نفسى جعت قبل كده بس معدتهاش وعوضت فتره الجوع بافتراس

2_اما جعت قد ايه فده حسب التساهيل وقوه عزيمتى بس غالبا مبيزدش عن ساعتين

3_سبب جوعى لما كنت عامله رجيم ياه فكرتونى بايام زمان اللى مش عارفه ارجعها تانى

عارفين فى ناس بتغير دينها عشان كبايه ميه

عارفين هما مين؟؟

عارفين دينتهم ايه؟

على فكره كان فى صور اصعب من دى كتير وكنت هحطها بس اختى قالت لى بلاش عشان متتنفروش من الموضوع

الصراحه مقتنعتش اوى قلت احنا مش قادرين بس نشوف الصور طيب اللى فى الوضع نفسه هيعملو ايه

طيب بعد مشفنا الصور هنعملهم ايه ؟؟؟؟

عارفين فى ناس عملولهم عارفين هما مين !!!

مش مسلمين جماعه التنصير قالو لهم احنا بنسعدكم واخوانكم المسلمين مش بيسعدوكم وللاسف فى منهم ارتد عن الاسلام عشان ياكل ويأكل عياله الا من رحم ربى

مش هنقول ملناش دعوه لا كفايه سلبيه

لو كل واحد وكل واحده فينا نزل الصور دى ولزقها فى نوته صغيره

وجاب صندوق هدايا وفتحو من فوق ومرر النوته والصندوق على صحابه وقرايبه

وجيرانه وجمع تبرعات واعلمو ان الله لايضيع اعمالنا

نروح لاى بنك ونحط الفلوس على الحساب ده

للتبرع من مصر :عن طريق حوالة لحساب جمعية العون المباشر في الكويت ، بالمعلومات التالية :

بيت التمويل الكويتي - الفرع الرئيسي رقم الحساب (54686)

واعلمو بانه لن يسبقنى الى الله احد

وهننصر اسلامنا بأذن الله

وفى ذلك فليتنافس المتنافسون

ومتنسوش تجديد النيه والدعاء

استودعكم الله

السلام عليكم ورحمه الله وبركاته
انا مش هدون تانى لحد مظبط نيتى لحد مقفل مداخل الشيطان للوصول ليا
لانى للاسف بحس انى مبضفش جديد
وخايفه تكون المدونه مش فى ميزان حسناتى
وتكون حجه عليا مش ليا والصراحه انا عايزه اظبط نيتى وتكون خالصه لوجه الله انا ليه بدون وايه اللى بضيفه للاسلام
ادعولى ربنا يوفقنى ويبينلى ويرشدنى الا ما يحب ويرضى
ماشاء الله المدونات حاجه جميله جدا وتعتبر اعلام بديل بس العيب فيا
لانى كتير مش بجدد نيتى او بحس ان النيه مش مظبوطه او عامه
يعنى اول مدونت قلت ان شاء الله هعمل وهعمل وهعمل بس معملتش حاجه
ادعولى بظهر الغيب ان ربنا يستعملنى ولا يستبدلنى
ادعولى لو التدوين خير ليا فى دنيتى واخرتى ييسره لي
ادعولى تكون نيتى خالصه لله
عايزه اقول لكم متخلوش الوقت يضيع منكم وجددو النيه قبل متعملو اى حاجه
واسالو نفسكم ايه نيتنا فى التدوين
وادعولى يمكن قرارى ده يكون مدخل شيطان ويكون قفل باب خير ليا
وليكن شعارنا(حياتى كلها لله)
لا اله الا الله محمد رسول الله

الجزء التانى انا كشفت السر

ازيكم عاملين ايه فى الكام يوم اللى فاتو من غيرى معلشو بس كنت عامله اضراب اوعو تكونو معملتوش

انا قعدت فى بيتنا اساسا مكنش فى مظاهرات عندنا الظاهر كانت فى المحله بس

والحق يتقال مفيش حد نزل فى الشارع الا قله مقلله من البشر واللى منزلوش مش عشان ايجابين ولا بتاع

دول كانو خايفين اصل فى اشاعه بتقول كل اللى هينزل هينضرب وهتنكسر عربيته

نرجع لموضوعنا وسبنا من السياسه والكلام المليان ده وخلينا فى البدنجان والكلام اللى سمعتو منهم اسيبكم مع الحوار

وعشان اوصل لكم الحوار بصوره سهله لانكم مش هتفهمو لغه البدنجان هترجمه لكم بلغه تفهموها

الحواااااااااااااااااااااااااااااااااااااااااااااااااااار

بدنوجه:ايه ياجماعه هو احنا معدش حد بيشترينا ليه

بندج:مش عارف يمكن عشان ده مش الموسم بتعنا

رأفت:انت ياض يا بندج نقطنا بسكاتك موسم ايه ياعبيط

بندج: امال ايه يافليسوف عصرك

رأفت:السر فى حاجه حمرا وطعمه وجميله ومدوره وسعات مسكره و...

بدنوجه:وايه كمان يسى رأفت متكمل سكت ليه ولاخدت بالك انى وقفه

بندج:ههههه انتى غيرتى ولاايه يا بدنوجه ده كان بيحبها من ايام مكنا بذور

دلوقتى انتى اللى على الشجر

رأفت: قلت لك ميت مره ياض نقطنا بسكاتك تك خيبه كل متسلقها تشويها(ترجمه كل متكحلها تعميها)

بدنوجه: ليه متخليه يكمل ويقول على الطبخات اللى قبلى

بندج:لا والله مفيش غير الطماطم

رأفت: يا بدنوجه انتى اللى فى حياتى ومن فصليتى اما الطماطم هى سبب قلتنا فى السوق

تقول بدنوجه برقه متأكد يارفرف (ترجمه رأفت)

رأفت: طبعا متأكد هى استغلت احتياجنا ليها وثقتها ان احنا مبنبقاش مسقعه من غيرها

فغلت سعر الكيلو بتعها وبقا بثلاثه جنيه

بدنوجه: حرام عليها المتوحشه اللى مش فى قلبها رحمه مش مراعيا ظروف الموظف المصرى

اللهى يارب يرخص سعرها فى السوق وكل اللى معاه فلوس ومش معاه يشتريها

بندج ورأفت فى نفس واحد: امييييييييييييييييييييييييييييييييييييييييين

بندج: بس انا سمعت الفول وانا بتمشى انه كمان معدش حد بيشتريه

رأفت: ليه هيعمللى فيها لحمه ولافراخ هو نسي نفسه هو كمان

بدنوجه:طيب ايه حجته والبت اللى اسمها طمطمايه ينفع يكلو الفول من غيرها

رأفت: لو ان طعم السندوتش بيها بيكون عسسسسل

بدنوجه بصوت جهجهونى:رأأااااااااااافت

بندج: لا لالامش قصده متسكت بقا يارأفت ولم الدور وخلينا فى خبيتنا

لا مش الطمطمايه حجته ده بيقول رغيف العيش

رأفت: ماله العيش هو كمان ده من يوم متخبز وهوا بيجيب وجع الدماغ

بندج: على رأيك بس الفول بيقول ان الجديد اليومين دول ان الناس كل ميروحو يشترو

العيش يرجعو شبعنين من الضرب من الوقوف فى الطوابير ومعدوش بيجو يشترو الفول واهم حاجه

عندهم يطلعو صحيين من الطابور وبقو بيكلو عيش حاف

بدنوجه:الله يكون فى عون الفول ده ميسواش حاجه من غير العيش صعبان عليا قوى

رأفت: يا داهيه دقى ده احنا كمان منسواش حاجه من غير العيش

بندج: ايووووه عرفتها يبقى ده كمان سبب قلتنا فى السوق

رأفت:لاحدق ياض جبت التائهه

بدنوجه:الهى يارب رغيف العيش يبقى عليه القيمه وكل اللى عنده صحه ومش عنده يقف فى الطابور ويطلع منه سليم

بندج ورافت وانا معاهم فى نفس واحد:امييييييييييييييييييييييييييييييييييييييييييييين

رأفت : ايه ياجماعه احنا نسينا اهم سبب فى قله طبختنا

بدنوجه:فى اهم من الطمطمايه سبب وكستنا

بندج: اه عرفت الحزب الوطنى

رأفت :انت ياض قلتلك اخرس المدونه لها اميلات (ترجمه الحيطان لها ودان)

بدنوجه:امال ايه؟؟؟؟؟

رأفت: ازازه الزيت يا مقليين(ترجمه فلحيين)

بندج: عندك حق دى اهم من سحلول نفسه(ترجمه.....)مخزوف عشان جبانه

بدنوجه:ده ازازه الزيت بقت ب10 جنيه والله حرررررررام يعنى خلاص معدش فى امل

ان احنا ننطبخ تانى

اللهى يارب ازازه الزيت ترجع ب4جنيه زى زمان والموظف يرجع يشتريها تانى

كل المصريين فى نفس واحد :اميييييييييييييييييييييييييييي

طبق خضار نادر جدا لظروف خاصه

ادينى اتاسفت اهوت لانى غلطت فى حقكم يا مصريين غبت عليكم فى وصفاتى الجهنميه
بس انا معزوره كل مقول هكتب لكم وصفه الاكلات اللى متربيا عليها زى الوست بيف وال جريك وهوت دج
ارجع اقول مش هيعرفوها قلت هدور على الاكل اللى انتم!! متعودين عليه لاكل الشعبى يعنى وقلت فرصه اكله ولو مره
فى حياتى المهم قعدت افكر هعلمكم ايه واستقريت على الطعميه بس رجعت فى كلامى قلت تلاقيكم من كتر مبتكلوها اتقنتوها
فقلت هعملكم مسقعه تكلو صوابعكم وراها فنزلت اجيب الباذنجان من السوق ملقتهوش خالص قلت لام نوال بتاع الخضار
انا:هو لحق خلص ده انا جيت بدرى المره دى
ام نوال:الله يخليكى ياروينا حلى عن نفوخى
انا: هو انا جيت جنب نفوخك يا طنط
ام نوال: الساعه واحده ونصف وتقولى بدرى بدرى من عمرك ياختى
انا:ياخساره ده انا عايزه احطو على مدونتى
ام نوال: مدونتك يعنى ايه وبتحطيها على البدنجان زى اللحمه المفرومه يعنى
انا:الله ينور عليكى طيب منتى بتشغلى نفوخك اهوت بس الفرق متحطيش عليها طماطم
ام نوال: طيب يختى هبقا اجربها
انا :عايزه بقا بدنجان يا ام نوال
ام نوال:معلش ياروينا انا معمتش بجيب كتير منه لان مفيش حد بقا بيشتريه
انا:ليه عشان صعوبه طريقه طبيخو اطمنى يا ام نوال هعلمهم
ام نوال: ياشيخه روحى علمى نفسك الاول
انا :بتقولى حاجه
ام نوال :بقول ان شاءلله منتحرمش منك وعشان خاطر عيونك فى 6بدنجنات كنت عيناهم لمدام سوزان
مش خساره فيكى
انا : ربنا يخليكى ليا وهعمل لنوال طبق تاكل صوبعها وراها
ام نوال:الله يخليكى لا ده نوال لسه فى المستشفى من يوم طبق الرز
انا: الف سلامه على نوال ياطنط وان شاء الله هعملها بسبوسه واروح ازورها
ام نوال:لاوالله متتعبيش نفسك وخليكى واكنك جيتى لها
انا : مع السلامه
استغربت اوى ليه الناس مبقوش بياكلو باذنجان واخذت قرار على عاتقى انى هنشر طريقته واعرف سر ندرته
وانا ماشيه سمعت صوت بيتكلم بصيت ورايا ملقتش حد بينى وبينكم اتوغوشت اوى وطلع الصوت من6 بدنجنات هما اللى بيتكلمو
قلت الحمد لله بحسبهم حاجه تانيه وهقول لكم الحوار اللى دار مبينهم اللى خلانى اعرف
ليه طبق الخضار بقا نادر !!!
وايه هيا الظروف الخاصه!!!