فراخ مسلوقه

ايوه سمعاكى وانتى بتقولى هيا روينا فكرانا مش بنعرف نعمل فراخ مسلوقه ولا ايه
اه انا بقول لكم مش بتعرفو تعملو مش كل واحده حطت فرخه فى ماء مغلى وسبتها شويه على النار
يبقى سلقت فارخه براحه كده وركزو معايا شويه
المكونات
1_فرخه تكون حلوه كده وزنها يتراوح بين 2الى 3كيلو وحيتكم متسترخصوش
2_ماء بس ميكونش من الحنفيه ويستحسن ميكنش من مصر لان الماء فى مصرالصراحه خساره فى الفراخ لانه نقى وشفاف ولايوجد به اى رواسب مش قلت مره يا بختك ياواد يامصرى
3_بصلتين وكما اوصانا رسولنا صلى الله عليه وسلم بالجارو ليسود بينا وبين جيراننا الحب ولن يسود
الحب الا اذا رفعنا الكلفه ولن ترفع الكلفه الا اذا استلفنا البصلتين من ام سامح اللى فوقينا
4_ملح افتكر ان ام سامح مش هتقول حاجه لو طلبتو منها شويه ملح مع البصلتين
5_ورق لورا (ابصم بالعشره انكم مش عرفينو ولا حتى ام سامح عارفاه)ابعتو الواد سامح يجيبه من عند العطار
6_حبهان
7_حله غويطه
الطريقه اتبعوها بالحرف الواحد وبلاش فذلكه ومتعملوش فيها ابو العريف
اول حاجه نجيب الحله ونحط فيها الماء ونستنا لحد متغلى
وبعدين نحط الفرخه فى الماء ونضع عليها 4او5 حبهان وورق اللورا
وشويه ملح بمقدار قبضه اليد برده زى الرز اللى سبق وقلت لكم عليه
والبصلتين بتوع ام سامح ونفضل جنب الحله لحد ميتكون الريم بتاع الشوربه ونقعد نشيله بالمعلقه
ونسيبها على النار لحد متستوى
طيب يا فلحين هتعرفو ازاى ان هيا استوت هقول لكم متخفوش
تشدو الفرخه من جناحها ان انكسر ولقيتو الفرخه بقت مكسوره الجناح
يبقى استوت متفتكروش ان كده خلاص لا لسه
تطلعى الفرخه من الشوربه وتحطيها فى صنيه وتدهينيها بعصير برتقال
وتولعى الشوايه بتاع الفرن وتسبيها 10 دقائق مبرووووووووووووك
الفرخه خلصت وتقدرى تقدميها لاسرتك اللى مش هتصدق انك انتى اللى عملاها وبلاش تقولى لهم انك عارفه الطريقه من المدونه عشان متكبرش وانتم اللى هتخسرو لانكم مش هتعرفو تكلمونى وانتم عارفيين اللى فيه ذره من الكبر مش هيدخل الجنه