تصورو جالى اميلات وفكسات ورسائل على الموبايل من الامهات اللى عملت فيهم جميل وقالولى بالفظ ده (ياروينا انتى شلت عنا الحمل بتاع العيال من بعد مكتبتى الفراخ المسلوقه والبت معدش جوزها بيغضبها والبت التانيه خطيبها بقا بيبوس ايدى عشان يكتب الكتاب بعد مكنت انا اللى ببوس ايده)وغيرها من الرسايل فشكرا لكم على ثقتكم بيا فانا شمعه تحترق من اجلكم
عشان كده قررت انى اكتب طبخه تانيه اتفضلو وركزو وأنسو بقا اى طريقه كنتم تعرفوها عن الرز قبل كده
1_تجيبى 3كبيات رز من تحت السرير(مش شرط تحت السرير بتختلف من بيت لاخر)2_تنقى الرز من الرواسب اللى فيه (هيبقى الرز كوبيتين اتاكدى بنفسك لان ده الغلط اللى البنات بتقع فيه
البنت منهم تقول منا عايرت الرز كويس امال مش مظبوط ليه)
3_تغسلى الرز مره واتنين وثلاثه لحد متلقيه ابيض كده ويشرح القلب الحزين(بقا الرز كبايه ونصف ياريت تتاكدى فى كل خطوه بقا اد ايه)
4_تجيبى الحله الغويطه اللى كنا سلقيين فيها الفراخ وتحطيها على النار وتضعى عليها ملعقه سمنه كبيره
تستنى لحد متسيح متستعجليش لان فى العجله الندامه
5_تضيفى الرز وتقعدى تقلبى لحد متلقيه اتشوح (مش عارفه ليه دايما يقولو شوحى الرز طيب فهمنا الرز طيب يعنى ايه شوحى)
6_تملى كبايه ونصف ماء تكون الكبايه نفس اللى ملتيها رز قبل كده
7_تضيفى الملح على الرز قبل ما الميه تغلى مقدارالملح ايه؟؟لا يا فلحه مش قبضه يد ده كان على كيلو رز
ضعى نصف قبضه يد
8_تسيبى المايه تغلى مع الرزعشر دقائق وبعدين توطى النار(ملحوظه متقلبيش الرز )
9_اطفى البوتجاز واغرفى ودوقيهم الرز المعجزه
قبل ممشى هديكم كمان هديه اصلى كريمه اوى وشاطره جدا و (مش عايزه اتكلم عن نفسى)
السلطه
تقطعى الطماطم
وعليها حاجه خضره (حسب الموجود فى التلاجه)
وبصله صغيره (الله يمسيكى بالخير يا امو سامح من يوم مسفرت السودان وانا محتاسه اصل ام ابرهيم مبتخزنش بصل) تبشرى البصل وتحطى عليه فلفل اسمر وملح وتقلبيه على السلطه وبالهنا والشفا
.jpg)
هناك 19 تعليقًا:
حقيقى انا ضايعه من غيرك انا مش عارفه لولا ملحظاتك المهمه ديه كنت بقيت فى الباى باى انا بشكرك جدا ياروينا وياريت وياريت تحجزيلى فى السرير اللى جنبك فى المستشفى وده بعد الاكله ان شاء الله
لما انتى الناس عماله تبعتلك ايميلات ومش ملاحقه عليها
امال ليه جايه تشحتى عندى فى المدونه
هههههههههههه
يخرب عقلك
طول عمرك بتخلينى افطس على نفسى من الضحك
بس انا نفسى فى اكله حلوه كده
تكون جديده
الغير معروفه
اطمنى سريرك محجوز لانى لما اشوفك هفتفتك حته حته
احب ان اطمان الجماهير بان الغير معروفه مدسوسه من قبل جهات معاديه
انا مش عايزه اظن بس مفيش غير البنت اللى اسمها نظيره
مدونه من اجل الحب
هو انتى جايه تحسدينى ولا ايه
وبعدين دى دعايه مش شحاته خليكى دقيقه فى لفظ الكلمات
واطمنى الاكلات الجديده جايه فى السكه بس بعلمكم اساس الطبخ الاول
السلام عليكم
أعزك الله
والله فعلا محتاجين لحاجة زى كده بس مش عارف هتبقى خفيفه ولا تقيلة
هايوكا يا شباب
يااااااااااااه يا روينا انقذتينا بالرز ده مش عارفة اقلك ايه فظيع طول عمرك شاطرة فى الطبيخ او البطيخ مش فارقة المهم كنت عايزة منك خدمة ضرووووورى انقذينى بيها اصل عندى عزومة كنت عايزة وصفة الكوسة بالباميا ويا ريت بقى معاها الحلو عايزة وصفة كيكة بالبخار ومحشية خيار سمعتى عنها دى تحفة وبيرشو عليها من فوق عسل اسود لو عرفتى تجيبى وصفتها يا ريت ولكى نحيل الشكر اه نسيت يا ريت رقم الاسعاف بالمرة او المطافى اى حاجة
اهلا بالمدسوسه التانيه هى نظيره بتديكم كام يعنى انا مستعده ادفع اكتر
شورو نفسكم كدا وقولولى
وانا من ضمن مميزاتى اللى انتم معرفتوش غير ربعها انى بفصل بين العمل والشغل فعشان كده هقول لكى احسن حد بيعمل الكيكه بالبخار اللى محشيه بالخيار
انتى تروحى لنظيره لانها هيا اللى متخصصه فى الحجات الجامده دى
عمر المصرى الحمد لله كل الايملات والفكسات اللى جت لى والتى ما زالت تتدفق بتقول ان الاكل خفيف وصحى
بقى الناس عمالين يبعتولك رسايل ويبوسي ايديكي تكملي موضوع الرز !!! شكلك أكلتي كتير من الرز اللي بتعمليه ده !!
على فكرة كنت في مطعم لبناني من كام يوم ولقيت في المنيو فيه رز باللوز رز بالزبيب رز بالبندق وانواع مكسرات تانيه ..انا جربت اللي باللوز بس كان تحححححفه .. انا دقت اللي بالزبيب في السعودية قبل كده بس المكسرات دي جديده وجميله جدا .. ابقى جربي تعمليه بالحاجات دي
اخيرا لي طلب غتت شوية .. نفسي أعمل شوكلاته سخنه زي اللي بيعلموها في المطاعم بره مش كاكاو لأ بيسموها "موس" بفتح الواو وساعات بيسموها هوت تشوكلت المهم انها بتبقى شوكلاته سايحه وعلى وشها كريمه وحاجه تحفه في البرد .. فو عندك فكرة اجيب مكوناتها منين يبقى خدمتيني لإني من مدمني العصاير ومدمني عملها فممكن أبدل معاكي الوصفه دي بأي وصفة عصير تحتاجيها .. مقايضه يعني ..
انا مش عارفه انتم بتدققو على حاجات بسيطه كده ليه يمكن ده اللى مأخرنا ودايما عقده الخواجا اللى مسيطره علينا يعنى المطعم اللبنانى عمل ايه يعنى زياده عن الرز بتاعى
هقول لكم لو انى مكنتش عايزه اقول عشان الثواب ميضعش مدير المطعم جه وطلب مقبلتى وانا مكنتش فاضيه خالص بس نتيجه للالحاح ووجع الدماغ قابلته وطلب طريقه الرز واديتهاله
هو بقا خد الطريقه وعملها وكانت طبعا وش السعد عليه وعلا عياله
اكمنو يعنى رش شويه لوز وبندق وزبيب
يبقى خلاص حاجه جديده ياجماعه مصر الاصل فى الرز مش تقولولى لبنان والسعوديه
واحب اطمئن الجماهير انى تحت امركم فى اى وصفه لانكم جيتم فى المكان المناسب وللشخص المناسب
طريقه عمل الشكولاته السايحه فى البيت ومش محتاجه نروح مطاعم
1_نجيب شكولاته خام من اى سوبر ماركت او من عند اسواق فتح الله
2_نسيح الشكولاته على النار (نضعها فى كيس بلستك فى ماء لحد متسيح بس اقفلو الكيس كويس عشان المايه متدخلش)
3_بعد متسيح نفك الكيس ونحطها فى طبق ونضيف عليها لبن ياسخن يا ساقع حسب الرغبه ونحطها فى اخلاط ونضيف السكر
4_نصبها فى مج او كوب برده حسب الرغبه ونشترى كريمه ونحطها على وشها
5_اشربو الموس بفتح الواووان لقيتو الواو مضمومه يبقى غلطو فى الطريقه
اى خدمه
معلش يا روينا اتاخرت عليكى فى الرد يا اوختشى
اصلى كنت بفض خناقه ام ابراهيم مع مرات ابراهيم
عالم دماغها فاضيه خالص من ساعت ما ام سامح سافرت و الخناقات نازله ترف اصل ام سامح كانت مصبره ام ابراهيم
يا شيخه احنا مالنا بسامح و بابراهيم ان شا الله يولعو فى بعض
المهم وصفه الرز هايله جدا
عملتها لخطيبى امبارح مع السلطه المعجزه طبعا مش عايزه اقولك ايه اللى حصل بعد اما كل
روح و قال لمامته كلمى خطبتى سكر و اسأليها عن الوصفات الجديده اللى هى بتعملها هتعجبك اوى
الست حماتى مصدقت كلمتنى و من ساعتها مش قادره الاحق على تليفوناتها كل شويه كل شويه ياريت تلحقينى بأه بباقى الوصفات علشان مبنش خيبه قدام الست دى برده ام الغالى خطيبى
انا مستنيه الوصفات الست لو افشتنى هيكون منظرى وحش جدا
سكر بنات
ده انا شايله فى قلبى كلاكيع من نحيتك
رحت الكليه وشفت كل العيال معدا انتى
بس اللى شفى غلى انك اتخدتى غياب
وبعدين انتى مالك بام ابرهيم دى ستك وتاج راسك
وبرده احب اطمنك ان حماتك هتحبك اكتر واكتر بعد الوصفه الجايه
هاى روينا هاى سكر هاى عليكو كلكم باركولنا يا جماعة الحمد لله نتيجتنا ظهرت ونجحنا والحمد لله رتبنا كمان ربنا يكرمنا ويوفقنا كمان وكمان يا ريت بقى يا روينا هدية نجاحى ولا هاتكليا عليا عايزة وصفة من ايديك الحلوة انا مش هاحددلك وصفة لايه انتى وزوقك بقى واما اشوف غلاوتى عندك اد ايه طبعا غالية صح انا عارفة لا بس انتى كنتى منورة الكلية النهاردة والله فرحت انى شفتك عايزين نشوفك علطول رغم انى زعلانة منك فرحانة عشان سكر اتخدت غياب لالا زعلتينى انا بهدى النفوس بس يلا ربنا معاكم بقى
بأه فرحتى فيا يا روينا
مااااااااااااااااااااااااااااشى
انا اللى كنت مكلمه اخو خطيبى عليكى
علشان يخطبك و عمالللله اقوله دى اختى
اختى
اختى
اخص عليكى
انا هقوله يصرف نظر عن الموضع ده خالص
الا اذا صالحتينىو انا مش هقبل باقل من صنيه بسبوسه او كنافه بالقشطه
سيف الهوا
مبرووووووووووك
ده انا هعملك طبق تحفه زى وشك بالضبط عشان نجحتى محنا مصدقنا عقبالى يارب نفسى انجح ادعو معايا امين يارب
ده انا بقالى ثلاث سنين شايله حاسب اللى
مع انى والله بفهم بس ظلمونى وكل مره يجبولى الامتحان بالانجليزى هما مش عارفين انى مقاطعه مش قلت لكم ظلم
بس يا مولعتيا ياسيف الهوا
سكر بنات
انا ماسكه لسانى ومش راضيه اتكلم
اقول
هقول
ولابلاششششششششش
وكمان مفيش كنافه ولابسبوسه
مبتهددشششششش
ازيك يا روينا عاملة اية
ياختى بدل ماتعلمى الناس طريقة الرز والفراخ اطبخيهم فى البيت الاول مش تقعدى تفعصيلنا فى الاكل ومنرضاش نكلة
روينا دى براحة اول اما بتدخل المطبخ متقعدش فيه نص ساعة وتطلع ومعاها صينية الاكل جاهزة اى نعم فى ناس بتقول عليها ان دى شطارة بس هو عك
إرسال تعليق