ازيكم عاملين ايه فى الكام يوم اللى فاتو من غيرى معلشو بس كنت عامله اضراب اوعو تكونو معملتوشانا قعدت فى بيتنا اساسا مكنش فى مظاهرات عندنا الظاهر كانت فى المحله بس
والحق يتقال مفيش حد نزل فى الشارع الا قله مقلله من البشر واللى منزلوش مش عشان ايجابين ولا بتاع
دول كانو خايفين اصل فى اشاعه بتقول كل اللى هينزل هينضرب وهتنكسر عربيته
نرجع لموضوعنا وسبنا من السياسه والكلام المليان ده وخلينا فى البدنجان والكلام اللى سمعتو منهم اسيبكم مع الحوار
وعشان اوصل لكم الحوار بصوره سهله لانكم مش هتفهمو لغه البدنجان هترجمه لكم بلغه تفهموها
الحواااااااااااااااااااااااااااااااااااااااااااااااااااار
بدنوجه:ايه ياجماعه هو احنا معدش حد بيشترينا ليه
بندج:مش عارف يمكن عشان ده مش الموسم بتعنا
رأفت:انت ياض يا بندج نقطنا بسكاتك موسم ايه ياعبيط
بندج: امال ايه يافليسوف عصرك
رأفت:السر فى حاجه حمرا وطعمه وجميله ومدوره وسعات مسكره و...
بدنوجه:وايه كمان يسى رأفت متكمل سكت ليه ولاخدت بالك انى وقفه
بندج:ههههه انتى غيرتى ولاايه يا بدنوجه ده كان بيحبها من ايام مكنا بذور
دلوقتى انتى اللى على الشجر
رأفت: قلت لك ميت مره ياض نقطنا بسكاتك تك خيبه كل متسلقها تشويها(ترجمه كل متكحلها تعميها)
بدنوجه: ليه متخليه يكمل ويقول على الطبخات اللى قبلى
بندج:لا والله مفيش غير الطماطم
رأفت: يا بدنوجه انتى اللى فى حياتى ومن فصليتى اما الطماطم هى سبب قلتنا فى السوق
تقول بدنوجه برقه متأكد يارفرف (ترجمه رأفت)
رأفت: طبعا متأكد هى استغلت احتياجنا ليها وثقتها ان احنا مبنبقاش مسقعه من غيرها
فغلت سعر الكيلو بتعها وبقا بثلاثه جنيه
بدنوجه: حرام عليها المتوحشه اللى مش فى قلبها رحمه مش مراعيا ظروف الموظف المصرى
اللهى يارب يرخص سعرها فى السوق وكل اللى معاه فلوس ومش معاه يشتريها
بندج ورأفت فى نفس واحد: امييييييييييييييييييييييييييييييييييييييييين
بندج: بس انا سمعت الفول وانا بتمشى انه كمان معدش حد بيشتريهرأفت: ليه هيعمللى فيها لحمه ولافراخ هو نسي نفسه هو كمان
بدنوجه:طيب ايه حجته والبت اللى اسمها طمطمايه ينفع يكلو الفول من غيرها
رأفت: لو ان طعم السندوتش بيها بيكون عسسسسل
بدنوجه بصوت جهجهونى:رأأااااااااااافت
بندج: لا لالامش قصده متسكت بقا يارأفت ولم الدور وخلينا فى خبيتنا
لا مش الطمطمايه حجته ده بيقول رغيف العيش
رأفت: ماله العيش هو كمان ده من يوم متخبز وهوا بيجيب وجع الدماغ
بندج: على رأيك بس الفول بيقول ان الجديد اليومين دول ان الناس كل ميروحو يشترو
العيش يرجعو شبعنين من الضرب من الوقوف فى الطوابير ومعدوش بيجو يشترو الفول واهم حاجه
عندهم يطلعو صحيين من الطابور وبقو بيكلو عيش حاف
بدنوجه:الله يكون فى عون الفول ده ميسواش حاجه من غير العيش صعبان عليا قوى
رأفت: يا داهيه دقى ده احنا كمان منسواش حاجه من غير العيش
بندج: ايووووه عرفتها يبقى ده كمان سبب قلتنا فى السوق
رأفت:لاحدق ياض جبت التائهه
بدنوجه:الهى يارب رغيف العيش يبقى عليه القيمه وكل اللى عنده صحه ومش عنده يقف فى الطابور ويطلع منه سليم
بندج ورافت وانا معاهم فى نفس واحد:امييييييييييييييييييييييييييييييييييييييييييييين
رأفت : ايه ياجماعه احنا نسينا اهم سبب فى قله طبختنابدنوجه:فى اهم من الطمطمايه سبب وكستنا
بندج: اه عرفت الحزب الوطنى
رأفت :انت ياض قلتلك اخرس المدونه لها اميلات (ترجمه الحيطان لها ودان)
بدنوجه:امال ايه؟؟؟؟؟
رأفت: ازازه الزيت يا مقليين(ترجمه فلحيين)
بندج: عندك حق دى اهم من سحلول نفسه(ترجمه.....)مخزوف عشان جبانه
بدنوجه:ده ازازه الزيت بقت ب10 جنيه والله حرررررررام يعنى خلاص معدش فى امل
ان احنا ننطبخ تانى
اللهى يارب ازازه الزيت ترجع ب4جنيه زى زمان والموظف يرجع يشتريها تانى
كل المصريين فى نفس واحد :اميييييييييييييييييييييييييييي
.jpg)
هناك 36 تعليقًا:
السلام عليكم
عندك حق والله يا روينا
عشنا وشفنا حتى الخضار بيتكلم وبيشتكى من الحالة اللى وصلنا ليها احنا فى زمن العجايب وكله من عمايل سحلول يا ترى مين تانى هيتكلم ويصرخ من حالنا
جميل اوى الحوار ده يا روينا فى وقته
السلامووو عليكووو
ازيك يا حاااااجة ؟
يا جمااااااااااااااعة .. إعلالالان هاااام
فيه سعر نزل .. انزل تحت شوية وهقول عليه
سعر الإنسان نزل فى الفترة الأخيره فى مصر فقط ... وأصبح مجانى
إيه رأيكو ؟؟
المفروض البتنجاية تفرح يا حاجة .. الإنسان هوا الأساس فى البتنجان ولا إيه ؟
أموت وأعرف الصور دى بتجبيها منييييين
الاخ عمر المصرى
عشنا وشفنا ايه ده لسه هنشوف اللى مفيش بلد شفته قبل كده
يارب اللطف بينا
جزاك الله خيرا على رايك
اخوانى حتى النخاع
فرحتنى اوى اوى
انا هجرى افرح بدنوجه ورافت وبقيت الشله ان فى حاجه رخصت فى البلد اصل حلتهم بقت صعبه اوى قفليين على نفسهم المطبخ ومش رضيين انى اطبخهم خالص
عندهم حق
رامى الحاج
الحمد لله ان الصور عجبت حضرتك
وبجيبها من مصادرى الخاااااصه
هو حضرتك مش بدون ليه فى (راجع)
الي فتاة الاندلس اعتقد ان حبك للخضار قد اثر عليك لدرجة حتي انها وصلت الي الكتابة نسال الله الا تكون قد وصلت الي التفكير
مدونة لحن الغروب
ندعوكي لتشريفي في مدونتي
http://anaabnalikwan.blogspot.com
مدونه لحن الغروب
الحمد لله لحقت نفسى فى اخر لحظه
جزاك الله خيرا على تشريفك لمدونتى
وجارى زياره لحن الغروب
لحن الغروب يقول
شكرا علي سرعة التلبية
اتمني التواصل المستمر بيننا والمشاركة في الاراء والافكا ر
مدونة لحن الغروب
والله يا روينا دمك زي العسل
ربنا يعينك ويعينا علي البدنجان
بس الحمد لله يحيي مش بيحبو اوي
لكن مش هيقدر يستغني عن الطماطم (مع الاعتذار لبدنوجة)
جميييل جدا اسلوبك ..والحوار تحفه ..
سلامى لبنوجة ..وبندج ..ورأفت (مين رأفت ده ؟)
تحياتى :)
ههههههههههه
عسل والله بجد مداونتك دمها خفيف وسلسه جداا
فعلا كل شئ اتجنن مش القوطه بس حتي الزيت والناس كمان اتجننت من الاسعار
تحياتي
رودي
هههههههههههههههه
يا جبانه
مش عايزه تقولى ترجمه سحلول
يخرب يعقل مش قادره امسك نفسى من الضحك
اه صحيح عرفتى الخبر مش تسليم المشروع اتاجل ليوم التلات
على فكره فى قصيده حلوة كتبتها سكر النبات ونشرتها عندى علىالمدونه ابقى تعالى اقريها وقوليلى رايك
مستنياكى
ايه اللسعان اللى انتوا فيه ده ...بصراحة انا سعيد ...سعيد انى قاريت الروقان ده كله ويا ريت تشرفونى كلكم انتى ونخوانى وعمر واى حد هيسيب تعليق على مدونتى بس من الاول سياسة ووجع دماغ ممنوع دخول أقل من99 سنة ..معلش
http://ahlammaya.blogspot.com/
ام يحيى
جزاك الله على رايك فى كلامى
لكى حق تقولى ان يحيى مش بيحبه
لانك بططبخيه بطريقه ابله نظيره مش طريقه ابله روينا
تابعينى وهتشوفى الطبخ اللى على اصله
سمر
نوررررررررتى مدونتى
قلت لبندج وبندوجه ورأفت ان سمر بتسلم عليكم بس الظاهر هيفضلو قفلين على نفسهم المطبخ مش راضيين يطلعو خالص كان عندهم امل ان الاضراب يعمل حاجه بس للاسف بقى الحال على ما هو عليه
الصراحة انا وانا ماشى كده بلف فى المدونة لقيت البطة
ف صعبت عليا قلت أعلق
بس أعلق على موضوع الطماطم و البدنجان
انا أصلا حياتى كلها بقت بدنجان اليومين دول وشكلى هتجنن قبل ما أخلص الكلية دى
المهم
أرجو من الرجل اللى بيهدد البطة انو يسيبها عشان يحلينا نشوف مذاكراتنا و نبطل تعليقات...
بنوته مصريه
انتى اللى عثل
والله عندك حق كل الناس فوتت ربنا يتولنا احنا غلابه والله
نورتينى بزيارتك
مدونه من اجل الحب
اه طبعا جبانه وستين جبانه عند عمو سحلول واقف عند حدىىىىىىىىى
بدال ميبقاش فى حد اسمه روينا
فرحتينى على المشروع ايوه كده ربنا يكتر ايامكم عشان تصلحو العك اللى بتقوو عليه مشروع
ههههههوهى من امتى سكر نبات بتكتب
هروح اشوفه حالا
sasatifa
تشرفت بزيارتكم
والحمد لله توافر فيا شروط دخول مدونتك
بس للاسف اخر شرط مينطبقش عليا لانى عندى 63 ونصف
بس هروح برده ان شاء الله
رامى الحاج
ايوه كده البطه عملت عميلها ده انا هسبها مبهدله لحد مترحموها وتردو عليا
والمذكره مش اهم من البطه
تعيش البطه تا تا تا تا تعييييييش
حلو اوى فعلا حوار المسقعه ده
ده اكيد طبعا بمناسبه الاحتفال بعيد ميلاد الوزه و ارتباط الفرخه بالديك و رجوع ام سيد من السفر (اصلها كانت فى الحجاز مع سيد)
المشكله كل دول هيكلو ايه ؟؟؟؟؟؟
ده عيد الميلاد اصبح مكلف جدا
حتى المسقعه مش عارفين نعملها علشان نطفى الشمع؟؟؟؟؟؟؟؟!!!!!!!
استغفر الله العظيم
اعشى العيال ايه انا ان شاء الله
عيالى ملقتش افرح بيهم ؟؟؟؟؟
انا بفكر اخدهم و اروح اعيش فى كوالالامبور
ربنا مع الشعب المصرى
و يا رب الحجات ترجع ترخص تانى علشان اعرف اعمل عيد الميلاد
انا نفخت البلالين اهو و مستنيه
يلا يلا يلا يلااااااااااااااا
يا حاجة روينا .. طبختى البتنجان ولا لسا ؟؟؟
إحنا جعانين .. بدل ما أخلى الحاج الوالد يعملهولى وأخلص نفسى
بس مين رأفت دا صحيح ؟؟ نسيت اسألك
حتى الخضار مش سيبونه فى حاله!!!!
سكر بنات
احمدك يارب ان شاعره كبيره زيك تيجى نعلق على العك بتاعى
الشعر ما شاء الله تحفه
(ربنا يسمحنى على النفاق ده)ورائع ومتناسق مع بعض جداااا
اما بالنسبه لعيد الميلاد فموعدكيش
معيش ولا ربع جنيه حتى ميكملش يجيب بيضه واحده لتورته
اخوانى حتى النخاع
لا انا رجعت فى كلامى خللى الحاج الوالد يعملها هو الاصل وبعدين انتم ناس متريشين وتقدرو تجيبو بدنجان
اما انا غلباااانه
اوعى تفكر
يارب يلطف بينا
جزاك الله خيرا على مرورك
وعد لو أبويا عمل بتنجان بطحينة أو حاجة زى كدا ممكن اصورها واجبلك صورة ..
قولتى إيه ؟؟؟
بس مسقعة لأ
ماشى ؟ ... وتشوفى البتنجان على أصوله
ا ل م احسب الناس ان يتركو ان يقولو امنا وهم ل يفتنون
اه انا قولت كده برضه
علي العموم وانا معاكي ومعاهم بنقول امين ,مش بعيد يجي وقت نحكي لولادنا عن ان كان في اصناف اسمها البدنجاون بيتاكل مع حاجه اسمها عيش كنا بناكلهم زمان
طبعا احنا في الوقت ده هنكون بناكل بكتابالمشروم!!!!!!!!
والله المستعان
اللهم يسر علي المسلمين جميعا
جزاكم الله خير
drpharma
صدق الله العظيم
جزاك الله خيرا على زيارتك
الفاتح الجعفرى
والله عندك حق ربنا يكون فى عون الاجيال اللى بعدناده احنا هنكون متنغنغين بالنسبه لهم وياررررررب يكونو احسن مننا
ليا بس استفسار يعنى ايه بكتابالمشروم
انا عارفه المشروم بس ايه اللى قبله
انا طبعا خبيره فى كل اصناف الاكل بس براجع
آآآآآآآآآآآآمين
---
الخضار نطق يا بني آدمين واحنا لسه ساكتين ؟
حسبي الله ونعم الوكيل
أنا هاخد بدنوجة وبندج ونطلع نعمل مسقعة (ترجمة مظاهرة)
خبيب
جزاك الله خيرا على مرورك
ترجمه مظاهره)هعمل انى مسمعتش ولاشفت
بدال ميقولو انتم اول ناس دعينو لمظاهره زى معملو فى اسراء عبد الفتاح (الفيس بوك)
استودعك الله
إرسال تعليق